„Ég nýtti tækifæri mitt vel, var með góð innkomu og flottar vörslur en það leiðinlega var að við náðum ekki stigunum tveimur sem voru í boði,“ sagði Ágúst Elí Björgvinsson, landsliðsmarkvörður í samtali við handbolta.is eftir landsleikinn við Portúgal í gærkvöld.
„Ég kom með góða tilfinningu inn í leikinn. Reyndi að vera í núinu og hafa gaman af,“ sagði Ágúst Elí sem sem viðurkennir að erfitt sé að eiga við portúgalska liðið enda er valinn maður í hverju rúmi, m.a. tíu leikmenn frá Porto sem leikur í Meistaradeild Evrópu.
„Þetta er engin smáþjóð með marga frábæra leikmenn. Ætli að þetta sé ekki eitt best samæfða landslið heims þar sem þeir eru alltaf að spila saman. Þetta var aðeins fyrsti leikurinn af þremur gegn þeim á rúmlega einni viku.
Næsta verk að búa sig undir næsta leik við Portúgali sem verður heima á sunnudaginn. Ég hlakka til að komast heim í vinnustaðasóttkví og matinn hjá kallinum á Grand hóteli. Maturinn hjá honum er þó nokkuð betri en maturinn hér í Portúgal til að mynda,“ sagði Ágúst Elí Björgvinsson léttur í bragði í samtali við handbolta.is í gærkvöld.
