- Auglýsing -
Handknattleiksmaðurinn Aron Dagur Pálsson hefur ákveðið að snúa heim eftir þriggja ára veru í Svíþjóð og Noregi og ganga til liðs við Íslands-, deildar- og bikarmeistara Vals.
Aron sem er 25 ára og getur jafnt leikið sem miðjumaður og skytta vinstra megin. Einnig er hann öflugur varnarmaður.
Aron Dagur varð á dögunum þrefaldur meistari með Elverum í Noregi en hann gekk til liðs við Elverum snemma árs frá sænska liðinu Guif. Frá 2019 til 2021 lék Aron Dagur með Alingsås í sænsku úrvalsdeildinni en síðara tímabilið átti liðið einnig sæti í riðlakeppni Evrópudeildarinnar.
Áður en Aron Dagur fór til Svíþjóðar sumarið 2019 lék hann með Stjörnunni í tvö ár. Í Garðabæ kom Aron Dagur frá Gróttu.
„Ég er mjög ánægður að hafa fengið Aron Dag til liðs við okkur. Hann er öflugur og góður leikmaður sem getur leyst margar stöður bæði í vörn og sókn og kemur til með að styrkja hópinn mikið næsta keppnistímabil,“ er haft eftir meistaraþjálfaranum Snorra Steini Guðjónssyni í tilkynningu frá handknattleiksdeild Vals.
Aron Dagur er fyrsti leikmaðurinn sem gengur til liðs við karlalið Vals eftir að keppnistímabilinu lauk fyrr í þessum mánuði.
- Auglýsing -
