Áður en lokað var fyrir félagaskipti í handknattleiknum hér heima um nýliðin mánaðarmót fékk FH örvhenta hornamanninn Alexander Már Egan að láni hjá Fram. Til stendur að Alexander Már leiki með FH til loka keppnistímabilsins í vor.
Meginástæðan fyrir komu Alexanders Más til FH er sú að Leonharð Þorgeir Harðarson er meiddur og alsendis óvíst hvenær hann getur beitt sér af krafti á handknattleiksvellinum.
Leonharð Þorgeir hefur verið einn traustasti leikmaður FH á undanförnum árum eftir að hann kom til félagsins frá Haukum. Hann hefur jöfnum höndum leikið í hægra horni og í skyttustöðunni hægra megin.
Alexander Már gekk til liðs við Fram á síðasta sumri frá Selfossi og samdi til tveggja ára. Hann verður klár í slaginn með FH þegar liðið sækir Íslandsmeistara Vals heim í Origohöllina annað kvöld í upphafsleik 14. umferðar.
