Þátttaka á HM í handknattleik er úr sögunni hjá handknattleikskonunni Birnu Berg Haraldsdóttur hjá ÍBV. RÚV greinir frá því í dag að Birna Berg hafi gengist undir aðgerð á hné í gær og verði frá keppni í tvo til þrjá mánuði. Heimsmeistaramótið hefst 30. nóvember. Einnig er ljóst að Birna leikur ekki meira með ÍBV fyrr en eftir áramót.
Birna Berg meiddist um miðjan síðari hálfleik í viðureign ÍR og ÍBV í Olísdeildinni á síðasta fimmtudag. RÚV segir að liðþófi í hné hafi rifnaði og brotnaði hafi upp úr brjóski. Teljist tíðindaritara handbolta.is rétt til var þetta sjöunda hnéaðgerðin sem Birna Berg gekkst undir á ferlinum.
Um síðustu helgi varð Birna Berg að draga sig út úr landsliðshópnum sem tekur þátt í tveimur leikjum í undankeppni EM, annarsvegar í kvöld við Lúxemborg á Ásvöllum og hinsvegar gegn Færeyingum á sunnudaginn í Þórshöfn.
Birna Berg fór frábærlega af stað með ÍBV á leiktíðinni og hefur m.a. skorað 46 mörk í fimm leikjum tímabilsins auk þess að hafa skorað yfir tug marka í Evrópuleikjum ÍBV á dögunum.
Auk Birnu Berg þá er Britney Cots frá keppni hjá ÍBV. Hún sleit hásin í kappleik í Portúgal fyrir hálfri annarri viku. Þá hefur Hrafnhildur Hanna Þrastardóttir verið frá keppni allt tímabilið til þessa vegna meiðsla og aðgerðar sem hún gekkst undir í sumar.
Hlé verður gert á keppni í Olísdeild kvenna rétt eftir miðjan nóvember vegna þátttöku landsliðsins á HM. Þráðurinn verður tekinn upp í byrjun janúar.
