Sænska handknattleikssambandið hagnaðist ágætlega á að halda heimsmeistaramótið í handknattleik í upphafi þessa árs. Mótið var haldið í samvinnu við pólska handknattleikssambandið.
Sænska handknattleikssambandið segir í tilkynningu frá að hagnaður þess af mótahaldinu verði um 25 milljónir sænskra króna, jafnvirði um 330 milljónum íslenskra.
Fimmtíu og einn af leikjum mótsins fór fram í Göteborg, Jönköping, Kristianstad, Malmö og Stokkhólmi.
Íslendingum að þakka
Fram kemur í frétt sænska handknattleikssambandsins að stuðningsmenn landsliða Íslands og Danmerkur hafi leikið stórt hlutverki í að svo góð niðurstaða fékkst af mótahaldinu. Íslendingar hafi fjölmennt til Kristianstad í riðlakeppni mótsins og tugir þúsunda Dana komu á leiki danska landsliðsins sem fram fóru í Malmö Arena.
Ljóst sé einnig að eftir hömlum var aflétt vegna kórónuveirunnar hafi fólk haft mikla þörf fyrir að koma saman sem hafi skilað sér í meiri áhuga á mótinu.
Talsverð umræða var um hátt miðaverð á síðustu leiki mótsins þegar dró nærri úrslitum. Engu að síður fengu færri en vildu.
Stefnt er á að talsverður hluti hagnaðarins verði nýttur til kynninga- og útbreiðslumála á handknattleik í Svíþjóð. Einnig verður eitthvað lagt í sjóð sem grípa má til á næstu árum.
Þess má geta að hagnaður Svía af HM er ekki fjarri heildarveltu Handknattleikssambands Íslands á einu ári.