- Auglýsing -
Íslenska landsliðið í handknattleik kvenna, skipað leikmönnum 18 ára og yngri, varð fyrir áfalli í dag í aðdraganda leiksins við Norður Makedóníu á heimsmeistaramótinu þegar ljóst varð að Elísa Elíasdóttir getur ekki tekið þátt.
Elísa hlaut höfuðhögg í leiknum við Íran í fyrradag. Hún hefur ekki jafnað sig auk þess sem ekki verður tekin nokkur áhætta á að tefla henni fram að þessu sinni enda alls ekki í fyrsta skipti sem Eyjastúlkan verður fyrir höfuðhöggi.
„Framhaldið verður metið á næstu dögum. Við sjáum hvað setur en þetta er alla vega ákvörðun sem við tökum fyrir þennan leik. Vonandi getur hún verið með okkur í þeim leikjum sem taka við eftir viðureigninina í dag,“ sagði Ágúst Þór Jóhannsson við handbolta.is fyrir stundu.
Elísa hefur leikið afar stórt hlutverki í landsliðinu, jafnt í vörn sem sókn, fram til þessa á mótinu auk þess að vera ein reynslumesti leikmaður liðsins.
Viðureign Íslands og Norður Makedóníu hefst klukkan 18.30 og verður í textalýsingu á handbolta.is auk þess sem þar verður einnig birtur hlekkur á streymi frá leiknum.
- Auglýsing -
