Vonir standa til þess að yfir 4.000 áhorfendur verði í Max Schmeling-Halle í Berlín á morgun þegar leikið verður til undanúrslita á heimsmeistaramóti 21 árs landsliða karla í handknattleik.
Áhuginn er meiri en áður hefur þekkst á viðlíka mótum.
Áhorfendamet var slegið í gærkvöld þegar Þýskaland og Danmörk áttust við í átta liða úrslitum. Alls greiddu 3.734 aðgangseyrir að leiknum og er óhætt að segja að rífandi góð stemning hafi verið á pöllunum enda var þýska liðið með byr í seglum.
Fyrra met var frá því að Þýskaland og Alsír áttust við í milliriðlakeppninni mótsins í Hannover, 3.587 mættu á þá viðureign.
Fimm þúsund á sunnudag?
Vonir standa til þess að 5.000 áhorfendamarkið verði rofið á sunnudaginn þegar leikið verður til úrslita. Ef þýska landsliðið leikur til úrslita telja menn að takmarkið náist örugglega.
Eins og mörgum er eflaust kunnugt þá leika annarsvegar Ungverjaland og Ísland í undanúrslitum á morgun klukkan 13.30 og hinsvegar Þýskaland og Serbía klukkan 16.