„Við vonumst til þess að Benedikt geti tekið meira þátt í næstu leikjum okkar á mótinu. Benedikt tognaði lítillega í fyrsta leik mótsins, við Marokkó. Þess vegna höfum við farið sparlega með hann fram til þessa,“ svaraði Einar Andri Einarsson annar þjálfara U21 árs landsliðs karla, spurður af hverju Benedikt Gunnar Óskarsson hafi komið svo lítið við sögu í fyrstu þremur leikjum íslenska landsliðsins á heimsmeistaramótinu sem stendur yfir í Aþenu í Grikklandi.
Benedikt Gunnar sló í gegn með Val á síðustu leiktíð auk þess sem hann hefur leikið stórt hlutverk í U19 og U20 ára landsliðunum tvö undanfarin ár.
Mikið að gera hjá Kára
„Kristófer Máni Jónasson fékk högg á hökuna í fyrri hálfleik í gær gegn Serbum. Sauma þurfti nokkur spor til að loka sárinu. Hann er klár í slaginn áfram og sömu sögu er að segja af öðrum leikmönnum.
Flestir leikmenn hafa orðið fyrir einhverjum pústrum en engum alvarlegum. Það hefur verið og er nóg að gera hjá Kára okkar Árnasyni sjúkraþjálfara,“ sagði Einar Andri sem sér ekki fram á að einhverjir leikmenn séu við það að hrökkva úr skaftinu vegna meiðsla.
