Rífandi gangur hefur verið hjá Handknattleikssambandi Íslands, HSÍ, í miðasölu á leiki íslenska karlalandsliðsins á heimsmeistaramótinu sem fram fer í Svíþjóð í janúar. Miðasalan hófst í byrjun júlí og stendur yfir í nokkrar vikur til viðbótar eða á meðan miðar verða til, að sögn Kjartans Vídó Ólafssonar markaðsstjóra HSÍ. Greinilegt er að mikill áhugi er eins og endranær fyrir að fylgja íslenska landsliðinu eftir á stórmóti.
HSÍ tryggði sér í sumar talsvert magn af dagpössum á leiki íslenska landsliðsins gegn Portúgal, Ungverjalandi og Suður Kóreu í riðlakeppninni sem fram fer í Kristianstad. Hver passi kostar 15.000 kr og gildir á báða leiki hvers leikdags.
Einnig er HSÍ með til sölu dagpassa í milliriðlakeppni mótsins sem leikin verður í Gautaborg 18. til 22. janúar. Í milliriðlum mætast þrjú lið úr C-riðli og þrjú úr D-riðli, þeim sem íslenska landsliðið er í. Í C-riðli eru Evrópumeistarar Svíþjóðar, Brasilía, Grænhöfðaeyjar og Úrúgvæ. Dagpassi á leikina í milliriðlakeppninni kostar 18.000 kr.
Dagpassar eru seldir í netverslun HSÍ – https://www.hsi.is/shop/
Leikjadagskrá Íslands í riðlakeppni HM í janúar: 12. janúar: Ísland - Portúgal. 14. janúar: Ísland - Ungverjaland. 16. janúar: Ísland - Suður Kórea. Komist íslenska liði áfram í milliriðla verða leikdagar 18., 20. og 22. janúar.
