„Þetta var hrikalega mikilvægur sigur í mjög erfiðum leik,“ sagði Elías Már Halldórsson þjálfari kvennaliðs Fredrikstad Bkl við handbolta.is í dag eftir að lið hans fagnaði sínum fyrsta sigri í annarri umferð norsku úrvalsdeildarinnar. Fredrikstad Bkl sótti tvö stig í heimsókn til Romerike Ravens í Lilleström. Lokatölur 26:23 eftir að staðan var jöfn í hálfleik, 13:13.
Viðureignin var lengi vel í járnum og mátti vart á milli sjá hvort liðið myndi fara með sigur úr býtum. „Við spiluðum ekki nægilega vel en gott að vinna og eiga ekki okkar besta dag. Það sýnir styrk,“ sagði Elías Már sem tók við þjálfun Fredrikstad Bkl. í sumar.
Birta Rún Grétarsdóttir var ekki í leikmannahópi Oppsal sem tapaði illa fyrir Evrópumeisturum Vipers Kristiansand, 37:14, í Kristiansand. Óslóarliðið er án stiga eftir tvo fyrstu leikina.
