Greint er frá því á vísir.is að ungverski markvörðurinn Martin Nágy verði lærisveinn Guðjóns Vals Sigurðssonar hjá Gummersbach á næsta keppnistímabili og yfirgefi þar með nýkrýnda Íslandsmeistara Vals.
Vísir hefur þetta samkvæmt heimildum sem leiða má líkum að séu nokkuð traustar.
Samkvæmt frétt vísis virðist vera að Nágy hafi gert munnlegt samkomulag við Val um að vera áfram um svipað leyti og umboðsmaður hans stóð í samningaviðræðum við Gummersbach. Nágy mun hafa nýtt sólríkan daginn í dag til þess að samþykkja tilboð Gummersbach og hryggbrjóta þar með Valsmenn um leið.
Gummersbach á von um að fara upp í þýsku 1. deildina en lokaumferð 2. deildar verður leikin á laugardaginn.
Nágy kom til Vals á síðasta sumri og óx ásmegin eftir því sem á keppnistímabilið leið sem lauk með að hann fór á kostum í úrslitaleikjunum tveimur gegn Haukum um Íslandsmeistaratitilinn í síðustu viku.
Björgvin Páll Gústavsson gengur til liðs við Val í sumar og Einar Baldvin Baldvinsson sem stóð vaktina með Nágý á leiktíðinni hefur þegar samið við Gróttu. Heimildir handbolta.is herma að Valsmenn séu þegar farnir að leita fyrir sér um markvörð í stað Nágy.
