Framkvæmdastjórn Íþrótta- og Ólympíusambands Íslands hefur samþykkt tillögur stjórnar Afrekssjóðs ÍSÍ að úthlutun fyrir árið 2021, en styrkveitingar ÍSÍ til sambandsaðila nema rúmlega 515 milljónum króna og er um að ræða hæstu úthlutun Afrekssjóðs ÍSÍ frá upphafi. Af þeim kemur hæsti styrkurinn í hlut Handknattleikssambands Íslands, 71,6 milljónir króna. HSÍ er eitt af átta sérsamböndum ÍSÍ sem eru í A-flokki en þau fá hæstu úthlutun.
„Við fögnum þessari úthlutun en með henni er okkur áfram gert kleift að halda áfram því góða afreksstarfi sem við höfum haldið úti á síðustu árum,” sagði Róbert Geir Gíslason í samtali við handbolta.is dag.
Eins og venjulega verður nóg að gera hjá Róberti og félögum hjá HSÍ í upphafi árs en karlalandsliðið kemur saman 2. janúar til undirbúnings fyrir tvo leiki í undankeppni EM2022 og tekur síðan þátt í heimsmeistaramótinu í Egyptalandi sem hefst 13. janúar. Í mars stendur síðan fyrir dyrum forkeppni heimsmeistaramótsins hjá kvennalandsliðinu.
Fram kemur í tilkynningu frá ÍSÍ að framlag ríkisins til Afrekssjóðs ÍSÍ hafi hækkað mikið á undanförnum árum og var fyrir þetta ár 400 milljónir króna. Framlag ríkisins fyrir árið 2021 lækkar um 8 milljónir króna frá síðustu árum og verður 392 milljónir króna. Afrekssjóður ÍSÍ er annars fjármagnaður með hlutdeild úr tekjum íþróttahreyfingarinnar frá Íslenskri Getspá samkvæmt ákvörðun Íþróttaþings ÍSÍ.
Til Afrekssjóðs ÍSÍ bárust umsóknir frá 31 sérsambandi. Að þessu sinni hljóta 30 sérsambönd styrk vegna afreksíþróttastarfs og landsliðsverkefna og er um misháar upphæðir að ræða.
Heildarkostnaður afreksíþróttastarfs hjá þeim sérsamböndum sem sóttu um til Afrekssjóðs ÍSÍ vegna ársins 2021 nema um 2.549 m.kr. og er stuðningur sjóðsins því að meðaltali um 20% af kostnaði sérsambanda, en þess má þó geta að árið 2016 var hlutfallið um 11%.
Sérsamböndin eru flokkuð í þrjá hópa en í A-flokki eru þau sambönd sem eru flokkuð sem afrekssérsambönd. Ekki var gerð breyting á flokkun sérsambanda milli flokka að þessu sinni.
Nánar er hægt að kynna sér úthlutun úr Afrekssjóðnum til einstakra sérsambanda með því á vef ÍSÍ sem er finna hér.
