„Leikurinn fór nánast eins og við ætluðum,“ sagði Kristinn Guðmundsson annar þjálfari karlaliðs ÍBV eftir að liðið féll úr leik í undanúrslitum Íslandsmótsins í handknattleik, Olísdeild karla, þrátt fyrir sigur á Val í síðari leiknum í Origohöllinni á Hlíðarenda í gærkvöld, 29:27. Valur vann fyrri leikinn með þriggja marka mun, 28:25, og leikur þar með til úrslita á Íslandsmótinu.
ÍBV stillti upp í sókn á síðustu sekúndum leiksins en Valsmaðurinn Einar Þorsteinn Ólafsson náði að komst inn í sendingu Eyjamanna og koma í veg fyrir að þeir næðu að komast í tækifæri til að skora þrítugasta markið sem hefði fleytt ÍBV áfram.
„Þetta var ekki nógu gott hjá okkur í síðustu sókninni,“ sagði Kristinn. „Hver er sinnar gæfu smiður. Að þessu sinni var þetta stöngin út hjá okkur en við höfum oft á tíðum komist í svipaða stöðu í leikjum og tekist að nýta hana. Því miður gekk það ekki að þessu sinni.“
Kristinn segir vonbrigði að hafa ekki komist í úrslitaleikina. Markmið ÍBV sé að vera alltaf í baráttu um sigurlaun í öllum mótum. „Við vorum grátlega nærri því að fara alla leið en töpum því miður fyrir frábæru Valsliði. Margt í okkar leik hefðum við mátt gera betur,“ sagði Kristinn sem var óánægður með varnarleikinn lengst af.
„Af þeim sökum lentum við í holu snemma leiks en náðum jafnt og þétt að vinna okkur til baka sem var mjög gott. En því miður vantaði bara herslumuninn upp á,“ sagði Kristinn Guðmundsson sem lætur af störfum hjá ÍBV í lok keppnistímabilsins og flytur til Færeyja þar sem hann hefur tekið að sér þjálfun á næstu leiktíð.
