„Við vorum búnir að grafa okkur í ansi djúpa holu eftir fyrri hálfleik en náðum að snúa taflinu við strax í síðari hálfleik. Ákefðin var meiri en við vorum ekki með neinar taktískar töfralausnir. Menn voru bara stórkostlegir, meðal annars Marel og Max. Þeir voru frábærir,“ sagði Einar Jónsson þjálfari Fram í samtali við handbolta.is eftir að Fram vann Aftureldingu með tveggja marka mun, 34:32, í Olísdeild karla í handknattleik í dag. Framarar voru sjö mörkum undir í hálfleik, 20:13.
Besti hálfleikur í vetur
„Seinni hálfleikur var hreint stórkostlegur, sennilega sá besti hjá okkur í vetur, og alveg jafn góður og fyrri hálfleikurinn var lélegur,“ sagði Einar sem vildi ekki taka af Aftureldingarliðinu sem lék vel í fyrri hálfleik og refsa okkur.
„Við unnum, það skiptir máli. Það skiptir mestu máli að vera yfir eftir 60 mínútur sama hver staðan er í hálfleik. Satt að segja þá átti ég ekki von á því í hálfleik að við myndum vinna leikinn, ég skal viðurkenna það. Yfirbragðið á liðinu var ekki gott í fyrra hálfleik. Ég er í smá geðshræringu eftir þetta. Sigurinn var bara mjög góður,“ sagði Einar Jónsson þjálfari Fram glaður í bragði.
Lengra viðtal við Einar er að finna í myndskeiði hér fyrir ofan.
Ótrúleg kaflaskipti í Lambhagahöllinni – Fram er komið upp að hlið FH
