ÍBV leikur við Val í úrslitum um Íslandsmeistaratitilinn í handknattleik karla eftir að hafa lagt Hauka í þriðja sinn í undanúrslitum Olísdeildar karla í Vestmannaeyjum í kvöld með sjö marka mun, 34:27. ÍBV skoraði fjögur síðustu mörk leiksins en liðið réði lögum og lofum í síðari hálfleik eftir jafnan fyrri hálfleik. Staðan að honum loknum var 17:16, ÍBV í vil.
Fyrsti úrslitaleikurinn verður í Origohöll Valsmanna fimmtudaginn 19. maí og eins og í undanúrslitum þarf að vinna þrjá leiki til þess að vinna Íslandsmeistaratitilinn. Valur er ríkjandi Íslandsmeistari en ÍBV lék síðast til úrslita fyrir fjórum árum, árið sem liðið vann alla titla sem í boði voru.
Eins og áður segir var fyrri hálfleikur jafn. Strax í byrjun síðari hálfleiks gáfu Eyjamenn tóninn. Varnarleikur liðsins var ákveðnari, Haukar lentu í vandræðum og fengu á sig hraðaupphlaup sem varð til þess að leiðir liðanna skildu. ÍBV náði þriggja marka forskoti, 21:18, eftir sex mínútur. Eftir það létu Eyjamenn aldrei forskot sitt af hendi. Haukar komust næst þremur mörkum í nokkur skipti, 30:27, en náðu aldrei nær. Auk ónákvæmni í sóknarleikunum þá var varnarleikur Hauka aldrei eins öflugur.
Eyjamenn skoruðu 17 mörk í hvorum hálfleik en tókst að halda Haukum í 11 mörkum í síðari hálfleik.
Virkilega var gaman að sjá unga leikmenn eins og Elmar Erlingsson, Gauta Gunnarsson, Nökkva Snæ Óðinsson, Gabríel Martinez Róbertsson og fleiri í stórum hlutverkum, ekki bara í þessum leik heldur einnig í undanförnum leikjum.
Fróðlegt verður að sjá hvernig Eyjamönnum á eftir að ganga gegn sterku Valsliði sem engin hefur komið böndum yfir síðustu vikur.
Ekki verður frá leiknum horfið án þess að minnast á frábæra stemningu í íþróttahöllinni í Vestmannaeyjum sem var þétt setin og hver einasti maður með á nótunum. Það er ekki auðvelt að lenda undir í slíkri stemningu. Hinsvegar er gaman að vera yfir í leikjum við þessar aðstæður, eins og einn Eyjamaður sagði í leikslok í kvöld.
Mörk ÍBV: Arnór Viðarsson 5, Ásgeir Snær Vignisson 5, Elmar Erlingsson 4/2, Kári Kristján Kristjánsson 4/4, Rúnar Kárason 3, Gabriel Martinez Róbertsson 3, Gauti Gunnarsson 3, Nökkvi Snær Óðinsson 2, Sveinn Jose Rivera 2, Friðrik Hólm Jónsson 1, Dagur Arnarsson 1, Petar Jokanovic 1.
Varin skot: Petar Jokanovic 6, 22,2% – Björn Viðar Björnsson 1, 14,3%.
Mörk Hauka: Stefán Rafn Sigurmannsson 5, Brynjólfur Snær Brynjólfsson 4/1, Tjörvi Þorgeirson 4, Adam Haukur Baumruk 4, Guðmundur Bragi Ástþórsson 2, Heimir Óli Heimisson 2, Ólafur Ægir Ólafsson 2, Darri Aronsson 2, Gunnar Dan Hlynsson 1, Geir Guðmundsson 1.
Varin skot: Stefán Huldar Stefánsson 12, 35,3% – Magnús Gunnar Karlsson 1, 10%.
Öll tölfræði leiksins er hjá HBStatz.
Handbolti.is er í Vestmannaeyjum og fylgist með leiknum í beinni textafærslu hér fyrir neðan.
