ÍBV leitar að línumönnum

Báðir línumenn kvennaliðs ÍBV í handknattleik, Ásdís Guðmundsdóttir og Elísa Elíasdóttir, ætla að söðla um í sumar, eftir því sem handbolti.is kemst næst. Leita forráðamenn handknattleiksdeildar ÍBV logandi ljósi að leikmönnum til að fylla skarð þeirra.

Heimildir handbolta.is herma að Elísa, sem er landsliðskona og var m.a. í A-landsliðinu á HM í desember, hafi tekið stefnuna á höfuðborgarsvæðið og ætli sér að halda áfram að leika þar samhliða námi. Mun hún hafa tilkynnt forráðamönnum ÍBV ákvörðun sína snemma á keppnistímabilinu

Ásdís, sem kom til ÍBV fyrir ári, flytur til Barcelona í sumar og ætlar að hella sér út í MBA-nám við háskóla í höfuðborg Katalóníu.