ÍBV semur við Dag til næstu tveggja ára

Handknattleiksdeild ÍBV hefur samið við Dag Arnarsson um framlengingu á samningi hans sem gildir til næstu tveggja ára.
Dagur miðjumaður og hefur verið lykilleikmaður í liði ÍBV undanfarin ár eða allt frá því að ÍBV varð Íslandsmeistari 2014. Þá var Dagur í veigamiklu hlutverki, aðeins 18 ára gamall.

Dagur er nú 25 ára og hefur leikið með ÍBV alla sína tíð. Hann er orðinn mjög reynslumikill miðað við aldur en þess má geta að síðastliðið vor lék hann sinn 250. leik fyrir félagið og hefur tekið þátt í öllum þeim titlum sem félagið hefur unnið frá árinu 2014.

„Við erum afar ánægð með að semja við Dag og hlökkum til áframhaldandi samstarfs,“ segir í tilkynningu handknattleiksdeildar ÍBV í morgun.