Unglingalandsliðskonan Inga Dís Jóhannsdóttir hefur ákveðið að segja skilið við HK og ganga til liðs við ungt og öflugt handknattleikslið Hauka sem gerði það gott í Olísdeildinni í vetur.
Hittir fyrir samherja
Inga Dís er ein af efnilegustu vinstri skyttum landsins og mun því styrkja lið Hauka fyrir komandi leiktíð. Hún á fjölda leikja að baki með yngri landsliðum Íslands og lék hún stórt hlutverk með U18 landsliðinu sem náði 8. sæti á HM síðasta sumar. Hjá Haukum hittir hún fyrir nokkra af samherjum sínum úr U18 ára landsliðinu sem stefna á þátttöku með U19 ára landsliðinu á EM í Rúmeníu í júlí.
Inga Dís kemur til Hauka frá HK þar sem hún hefur leikið upp yngri flokka auk þess að spila með meistaraflokksliði félagsins. Inga Dís var Poweradebikarmeistari með HK í 3. flokki í síðasta mánuði og Íslandsmeistari með HK í 3. flokki fyrir ári síðan.
„Við hjá Haukum bindum miklar vonir við komu Ingu Dísar til félagsins og hlökkum til að sjá hana á vellinum næsta haust,“ segir m.a. í tilkynningu frá handknattleiksdeild Hauka þar sem jafnframt er tekið fram að fleiri fréttir séu í farvatninu af leikmannamálum handknattleiksliða félagsins.
Stór skörð hafa verið hoggin í raðir kvennaliðs HK á síðustu vikum. Auk Ingu Dísar hafa Berglind Þorsteinsdóttir, Elna Ólöf Guðjónsdóttir og Ethel Gyða Bjarnesen tilkynnt flutning yfir til Fram.
