ÍR leikur til úrslita við Selfoss í úrslitum umspilsins um keppnisrétt í Olísdeild kvenna í handknattleik á næstu leiktíð. ÍR-ingar unnu öruggan sigur á Gróttu í uppgjöri liðanna í oddaleik í Skógarseli, heimavelli ÍR, 28:21, í dag. Mestur varð munurinn 12 mörk í síðari hálfleik.
Fyrsti leikur Selfoss og ÍR fer fram á miðvikudagskvöld í Sethöllinni á Selfossi. Vinna þarf þrjá leiki til þess að öðlast sæti í Olísdeild kvenna á næstu leiktíð.
ÍR, sem hafnaði í öðru sæti Grill 66-deildar kvenna í vetur kom mun betur stemmt til leiks og tók strax völdin í leiknum. Ætlaði ekki að brenna sig á sama soðinu tvisvar en Grótta var með yfirhöndina frá upphafi í annarri viðureign liðanna á miðvikudagskvöld í Hertzhöllinni.
Strax eftir fimmtán mínútur hafði ÍR náð fjögurra marka forystu, 8:4. Allt fram að hálfleik var um einstefnu að ræða. Leikmenn ÍR fór með 10 marka forystu inn í hálfleikshléið, 16:6.
Munurinn var alltof mikill fyrir Gróttu. ÍR-ingar bættu í forskotið fremur en hitt og voru mest 12 mörkum yfir, 27:15.
Þetta er annað árið í röð sem ÍR kemst í úrslit umspilsins. Á síðasta ári biðu ÍR-ingar lægri hlut í rimmu við HK, sem eins og Selfoss nú, hafnaði í næst neðsta sæti Olísdeildar og tók þar með þátt í umspilinu.
Mörk ÍR: Karen Tinna Demian 6, Matthildur Lilja Jónsdóttir 4, Sólveig Lára Kjærnested 4, Hanna Karen Ólafsdóttir 3, Hildur Öder Einarsdóttir 2, Laufey Lára Höskuldsdóttir 2, Anna María Aðalsteinsdóttir 2, Dagbjört Ýr Ólafsdóttir 1, Vaka Líf Kristinsdóttir 1, Ásthildur Bertha Bjarkadóttir 1, Stefanía Ósk Engilbertsdóttir 1, Sigrún Ása Ásgrímsdóttir 1.
Varin skot: Hildur Öder Einarsdóttir 13.
Mörk Gróttu: Katrín Helga Sigurbergsdóttir 7, Ída Margrét Stefánsdóttir 4, Þóra María Sigurjónsdóttir 4, Katrín Anna Ásmundsdóttir 3, Guðrún Þorláksdóttir 2, Lilja Hrund Stefánsdóttir 1.
Varin skot: Soffía Steingrímsdóttir 14, Ingibjörg Gróa Guðmundsdóttir 3.
