ÍR tyllti sér á topp Grill66-deildar kvenna í kvöld með fimm marka sigri á Gróttu í Austurbergi, 25:20. ÍR komst stigi upp fyrir FH og Selfoss sem eiga leik til góða. Á sama tíma vann Víkingur öruggan sigur á Fjölni/Fylki, 24:15, í Víkinni. Því miður virðist róður Fjölnis/Fylkisliðsins ætla að verða þungur á keppnistímabilinu.
Við tapið dróst Grótta nokkkuð aftur úr öðrum þeim liðum deildarinnar sem stefna á vera í kapphlaupinu um sæti í Olísdeild á næstu leiktíð.
Grótta er með fjögur stig eftir fimm leiki í sjöunda sæti. ÍR, undir stjórn Jakobs Lárussonar, er á hinn bóginn með sjö stig og ætlar sér greinilega að halda í við FH-inga og Selfyssinga.
Grótta var marki yfir að loknum fyrri hálfleik en missti niður þráðinn í þeim síðari um leið og ÍR-liðið gekk á lagið.
Víkingur er kominn með fjögur stig eftir fjóra leiki og hafði talsverða yfirburði í leiknum við Fjölni/Fylki sem er í næst neðsta sæti með tvö stig þegar liðið hefur lagt að baki fimm leiki.
ÍR – Grótta 25:20 (11:12).
Mörk ÍR: Karen Tinna Demian 8, Hildur María Leifsdóttir 6, Ksenija Dzaferivic 4, Sylvía Jónsdóttir 2, Auður Margrét Pálsdóttir 2, Stefanía Ósk Hafberg 2, Fanney Ösp Finnsdóttir 1.
Mörk Gróttu: Katrín Anna Ásmundsdóttir 5, Katrín Helga Sigurbergsdóttir 5, Valgerður Helga Ísaksen 2, Guðný Hjaltadóttir 2, Rut Bernódusdóttir 2, Hrafnhildur Hekla Grímsdóttir 2, Jónína Líf Gísladóttir 2.
Víkingur – Fjölnir/Fylkir 24:15 (12:9).
Mörk Víkings: Auður Brynja Sölvadóttir 6, Arna Þyrí Ólafsdóttir 6, Ester Inga Ögmundsdóttir 4, Sigurlaug Jónsdóttir 3, Ástrós Birta Birgisdóttir 2, Kara Rún Árnadóttir 2, Elína Helga Lárusdóttir 1.
Mörk Fjölnis/Fylkis: Kolbrún Anna Garðarsdóttir 7, Anna Karen Jónsdóttir 2, Telma Sól Bogadóttir 2, Harpa Elín Haraldsdóttir 1, Hrafnhildur Irma Jónsdóttir 1, Ada Kozicka 1, Erla María Magnúsdóttir 1.
Stöðuna og næstu leiki í Grill66-deild kvenna má sjá hér.
