Ísak Rafnsson er síður en svo á leiðinni úr Kaplakrika þar sem hann hefur leikið með FH allan sinn feril, að einu ári undanskildu, er hann var í herbúðum Tirol í Austurríki, leiktíðina 2018/2019. Í morgun greindi Handknattleiksdeild FH frá því að Ísak hafi skrifað undir nýjan tveggja ára samning við félagið.
Ísak, sem er 28 ára gamall, hefur verið einn traustasti varnarmaður Olísdeildarinnar um árabil.
„Við erum gríðarlega ánægðir með þennan nýja samning við Ísak. Hann er drengur góður, með mikið og stórt FH-hjarta og hefur undanfarin ár verið einn af okkar allra bestu og mikilvægustu leikmönnum, innan sem utan vallar,“ segir Ásgeir Jónsson formaður Handknattleiksdeildar FH í tilkynningu sem félagið sendi frá sér af þessu tilefni.
FH deilir meðfylgjandi myndskeiði með fregnum að nýjum samningi félagsins við Ísak. Þar má sjá hann taka til óspilltra málanna, jafnt í vörn sem sókn.
