Íslendingaslagur verður á laugardaginn í Doha í Katar þegar landslið Barein og Japan eigast við í úrslitaleik forkeppni Ólympíuleikanna í handknattleik karla, Asíuhluta. Japanska landsliðið, undir stjórn Dags Sigurðssonar, vann Suður Kóreu í síðari undanúrslitaleik keppninnar í kvöld, 34:23.
Fyrr í dag vann landslið Barein, sem Aron Kristjánsson þjálfar, dramatískan sigur á Katar, 30:29, í hinni viðureign undanúrslita.
Japan og Barein voru saman í riðli fyrr á mótinu. Japan vann viðureign liðanna með einu marki, 27:26. Barein hafði betur gegn Japan á Asíuleikunum fyrir nokkrum dögum, 30:28.
Siguriðið í úrslitaleiknum á laugardaginn tryggir sér farseðil í handknattleikskeppni Ólympíuleikanna næsta sumar. Tapliðið tekur sæti í forkeppni fyrir leikana sem fram fer í Evrópu um miðjan mars á næsta ári.
