Íslendingarnir þrír í herbúðum GWD Minden fögnuðu í kvöld sigri og um leið sæti í næstu umferð þýsku bikarkeppninnar þegar liðið lagði Eintracht Hildesheim, 29:23, á heimavelli Hildesheim-liðsins. Minden var tveimur mörkum yfir að loknum fyrri hálfleik, 13:11.
Aðalsteinn Eyjólfsson kvaddi meistaraliðið Kadetten Schaffhausen í Sviss í sumar og tók við þjálfun GWD Minden. Honum er væntanlega létt að vinna fyrsta leikinn og komast áfram í bikarkeppninni.
Bjarni Ófeigur Valdimarsson er einnig nýr í herbúðum GWD Minden. Hann skoraði þrjú mörk í fimm skotum auk þess að eiga þrjár stoðsendingar. Sveinn Jóhannsson náði ekki að skora en átti eina stoðsendingu auk þess að vera einu sinni vikið af leikvelli í tvær mínútur. Sveinn var fastur fyrir í vörninni að vanda.
Tengdar fréttir:
