Jakob Lárusson, sem þjálfaði kvennalið Kyndils í Þórshöfn í Færeyjum síðasta árið, er hættur og mun einbeita sér að þjálfun karlaliðs Kyndils á næstu leiktíð, eins og handbolti.is sagði frá í vor. Portúgalinn Paulo Costa tekur við þjálfun kvennaliðs Kyndils af Jakobi.
Frá þessu var sagt á heimasíðu Kyndils í dag.
Kyndill gerði það gott á síðustu leiktíð undir stjórn Jakobs. Liðið hafnaði í öðru sæti í deildinni, bikarkeppninni og í úrslitakeppninni, alltaf á eftir hina ægisterka liði H71, sem borið hefur ægishjálm yfir önnur lið í kvennahandboltanum í Færeyjum.
Jakob mun einbeita sér að karlaliði Kyndils ásamt David Edvardsen. Saman eiga þeir að blása til sóknar með liðið.
Costa kemur til Færeyja frá heimalandi sínu þar sem hann hefur þjálfað undanfarin þrjú ár en var þar áður með kvennalið Füchse Berlin frá 2018 til 2020.
