Janus Daði Smárason leikur ekki fleiri leiki með íslenska landsliðinu í handknattleik á heimsmeistaramótinu í Egyptalandi. Þetta var tilkynnt á blaðamannafundi sem Handknattleikssamband Íslands hélt nú síðdegis í Kaíró. Janus Daði kveður íslenska hópinn væntanlega á morgun.
Janus Daði hefur um nokkurt skeið átti í meiðslum í öxl síðan keppnistímabilið hófst í Þýskalandi í haust og jafnvel lengur. Reynt hefur verið að halda þeim niðri eins og kostur er og m.a. tók Janus ekki þátt í leiknum við Alsír í gærkvöld. Nú er svo komið að sögn Guðmundar Þórðar Guðmundssonar, landsliðsþjálfara, að lengra verður ekki gengið.
„Janus er sárþjáður í öxlinni og getur ekki leikið meira með okkur á mótinu sem er mikið áfall. Reynt hefur verið að stýra álaginu en því miður þá hefur það ekki dugað til. Við vonuðumst til að hann myndi sleppa í gegnum riðlakeppninar og gæti þá verið tilbúinn í slaginn í milliriðlakeppninni en ljóst er að svo verður ekki. Því miður er það niðurstaðan að Janus Daði yfirgefur hópinn eftir helgina. Þetta er mikið högg fyrir okkur og gerir okkur erfiðara fyrir í framhaldinu,“ sagði Guðmundur Þórður sem segir ekki ljóst á þessari stundu hvort kallaður verður inn varamaður.
„Við erum að skoða kostina í stöðunni en það er ljóst að ekki er einfalt að koma manni inn í landið og inn í búbbluna eins og ástandið erum þessar mundir. Þess utan var endanlega niðurstaða að koma í þetta mál rétt áðan,“ sagði Guðmundur Þórður ennfremur.
„Janus Daði er mikilvægur og reynslumikill leikmaður í okkar hóp. Fjarvera hans bætist ofan á annað eins fjarveru Arons Pálmarssonar og Hauks Þrastarsonar sem einnig eru meiddir.
Guðmundur sagði Elvar Örn Jónsson og Magnús Óla Magnússon vera þá menn sem geta tekið við leikstjórnendahlutverkinu. Hugsanlega gæti Magnús Óli tekið við stærra hlutverki þar sem hann var valinn til að leysa úr tveimur stöðum, á miðjunni og í vinstri skyttustöðunni. „Magnús Óli er til taks,“ sagði Guðmundur og bætti við aðspurður hugsanlega verði gerðar breytingar á liði sem leikur við Marokkó á morgun frá viðureigninni við Alsír í gærkvöld.
„Við erum að skoða þessa stundina hvort við gerum breytingar á 16 manna hópnum fyrir leikinn á morgun,” sagði Guðmundur Þórður Guðmundsson, landsliðsþjálfari, á blaðamannafundi HSÍ í Kaíró fyrir stundu. Hann vildi ekki fara út hverjar þær breytingar yrðu ef af verður.
