Landsliðskonan í handknattleik, Jóhanna Margrét Sigurðardóttir, færir sig um set innan Svíþjóðar í sumar. Hún hefur samið við úrvalsdeildarliðið Kristianstad Handboll. Undanfarin nærri tvö ár hefur Jóhanna Margrét leikið með Skara HF sem einnig leikur í úrvalsdeildinni.
Kristianstad Handboll hafnaði í fimmta sæti úrvalsdeildarinnar í vor, einu sæti ofar en Skara HF, og leikur þessa dagana við Önnered í átta liða úrslitum úrslitakeppninnar.
Í tilkynningu Kristianstad er m.a. haft eftir Jóhönnu að hjá Kristianstad eigi hún þess kost að halda áfram að þróast sem handknattleikskona við allra bestu aðstæður. Eftir tvö ár hjá Skara vilji hún takast á við nýjar áskoranir.
Með liði Kristianstad Handboll leikur um þessar mundir Hafnfirðingurinn Berta Rut Harðardóttir. Andrea Jacobsen landsliðskona lék með Kristianstad Handboll frá 2018 til 2022.
Var í landsliðinu á HM
Jóhanna Margrét var í landsliðshópnum sem tók þátt í heimsmeistaramótinu undir lok síðasta árs og var einnig í hópnum sem tryggði sér sæti á EM 2024 í snemma í þessum mánuði. Hún á 15 landsleiki að baki auk fjölda leikja fyrir yngri landsliðin.
Áður en Jóhanna Margrét flutti til Svíþjóðar fyrir nærri tveimur árum lék hún með uppeldisfélagi sínu, HK, og varð m.a. markahæst í Olísdeildinni vorið 2022.
