Jóhanna og liðsfélagar fara vel af stað hjá nýjum þjálfara

Jóhanna Margrét Sigurðardóttir og liðsfélagar í Kristianstad HK fara vel af stað eftir EM-hléið í sænsku úrvalsdeildinni í handknattleik undir stjórn nýs þjálfara. Þær unnu í kvöld Ystads IF HF, 29:27, á útivelli í áttunda leik liðsins á leiktíðinni.

Jóhanna Margrét skoraði þrjú mörk úr fjórum skotum. Berta Rut Harðardóttir var ekki í leikmannahópi Kristianstad HK að þessu sinni.

Með sigrinum lyfti Kristianstad HK sér upp um eitt sæti, upp í það níunda með sex stig. Tólf lið eru í sænsku úrvalsdeildinni.

Meðan EM stóð yfir tók Uffe Larsson við þjálfun Kristianstad-liðsins af Bjarne Jakobsen. Áður hafði Kristianstad tapað hverjum leiknum á eftir öðrum, m.a. fyrir Val í tvígang í 32-liða úrslitum Evrópubikarkeppninnar.