- Auglýsing -

Jokanovic, Eyrún Ósk, Bergvin Snær og Stefán í leikbann

spjald - spjöld

Markvörðurinn Petar Jokanovic tekur út leikbann annað kvöld þegar ÍBV sækir Fram heim í Úlfarsárdal í viðureign liðanna í Olísdeild karla. Jokanovic var úrskurðaður í eins leiks bann á fundi aganefndar HSÍ. Hann hlaut útilokun með skýrslu vegna grófs leikbrots í leik Hauka og ÍBV á síðasta laugardag og mátu dómarar brotið falla undir reglu 8:10 a.


Jokanovic var ekki sá eini sem nefndin úrskurðaði í bann á síðasta fundi sínum. Eyrún Ósk Hjartardóttir leikmaður Fjölnis/Fylkis hlaut einnig útilokun í síðasta leik liðsins er það sótti HK U heim í Grill 66-deild kvenna á sunnudaginn. Hennar brot fellur einnig undir reglu 8:10 a. Segir í úrskurði aganefndar að Eyrún Ósk verði einnig að taka út eins leiks bann.

Eftirmálar af uppákomu

Ljóst er að eftirmálar verða af uppákomu sem varð í leik ungmennaliða Aftureldingar og HK í 2. deild karla á dögunum og handbolti.is sagði frá.


Ljóst er að Bergvin Snær Alexandersson leikmaður Aftureldingar má ekki leika með liðinu í næsta leik vegna leikbanns sem hann var úrskurðaður í á fundi aganefndar. Hann hlaut útilokun með skýrslu vegna mjög grófrar ódrengilegrar hegðunar í fyrrgreindum leik og er metið að brot hans falli einnig undir reglu 8:10 a.

Verðskuldar lengra bann

Stefán Scheving Th. Guðmundsson samherji Bergvins Snæs hlaut útilokun með skýrslu vegna mjög grófrar ódrengilegrar hegðunar í áðurnefndum leik U liða Aftureldingar og HK. „Aganefnd telur brot leikmannsins verðskulda lengra bann en 1 leik. Mun aganefnd tilkynna skrifstofu HSÍ um málið, sbr. 1. mgr. 3. gr. reglugerðar HSÍ um agamál.“ Þar með virðist ljóst að Stefán gæti misst af fleiri en einum leik.


Stefán hefur ekki aðeins verið í ungmennaliði Aftureldingar heldur einnig með Olísdeildarliði Mosfellinga.

Fjórir áminntir

Egidijus Mikalonis leikmaður Kórdrengja, Heimir Óli Heimisson leikmaður Hauka, Gunnar Kristinn Malmquist Þórsson leikmaður Aftureldingar og Ágúst Atli Björgvinsson leikmaður Aftureldingar U sem einnig hlutu útilokun með skýrslu vegna grófra leikbrota í leikjum síðustu daga voru ekki úrskurðaðir í bann. Brot þeirra falla undir reglu 8.5 a eða b. Þeim er góðfúslega bent á stighækkandi áhrifum útlokana vegna slíkra brota.

Úrskurður aganefndar HSÍ 22. nóvember.

- Auglýsing -
- Auglýsing -

Nýjustu fréttir

- Auglýsing -