Jónatan Þór Magnússon flytur ekki til Skövde í Svíþjóð í sumar og tekur við úrvalsdeildarliði félagsins í karlaflokki eins og til stóð. Akureyri.net segir frá þessu í dag og hefur samkvæmt heimildum. IFK Skövde mun vera í hinum mestu fjárhagserfiðleikum og hefur það komist að samkomulagi við Jónatan að ekkert verði af komu hans til félagsins.
Eftir því sem Akureyri.net mun þetta vera nýlega komið upp úr dúrnum og þar af leiðandi óvíst hvað tekur við hjá Jónatani sem hætti þjálfun karlaliðs KA í lok leiktíðar. Halldór Stefán Haraldsson var ráðinn í stað Jónatans Þórs.
Jónatan Þór samdi við IFK Skövde í byrjun mars til tveggja með ákvæði um eins árs viðbót ef allt léki í lyndi.
IFK Skövde hafnaði í sjötta sæti sænsku úrvalsdeildarinnar í vor og féll úr keppni í átta liða úrslitum fyir Ystads IF. Vorið 2021 og 2022 lék lið IFK Skövde til úrslita um sænska meistaratitilinn en tapaði í bæði skiptin.
Uppfært: IFK Skövde hefur staðfest á heimasíðu sinni að sökum fjárhagserfiðleika verði ekkert að því að Jónatan Þór taki við þjálfun liðsins. Kristian Svensson hefur verið ráðinn þjálfari IFK Skövde.
