Díana Dögg Magnúsdóttir skoraði fjögur mörk fyrir BSV Sachsen Zwickau í kvöld þegar liðið vann afar mikilvægan sigur á Sport-Union Neckarsulm, 32:25, á heimavelli í þýsku 1. deildinni í handknattleik. BSV Sachsen Zwickau komst upp úr mestu fallhættunni með þessum sigri. Liðið er í 11. sæti af 14 með 10 stig eftir 19 leiki. Sjö umferðir eru eftir. Fækkað verður um tvö lið í deildinni frá og með næsta keppnistímabili.
Díana átti einnig tvær stoðsendingar, var með þrjú sköpuð færi, vann þrjú vítaköst og stal boltanum einu sinni af andstæðingunum. Tvisvar var Eyjakonunni vikið af leikvelli, í tvær mínútur í hvort skipti.
Næsti leikur BSV Sachsen Zwickau verður við meistara Bietigheim eftir viku.
Sport-Union Neckarsulm og Bad Wildungen eru í tveimur neðstu sætunum um þessar mundir. Stöðuna í þýsku 1. deildinni og fleiri deildum evrópsks handknattleiks er að finna hér.
Bikarmeistarar TuS Metzingen töpuðu fyrir Buxtehude, 27:22, á útivelli. Sandra Erlingsdóttir er samningsbundin Metzingen en verður í fæðingaorlofi fram á næsta keppnistímabil.
