Karen Tinna Demian, fyrirliði Olísdeildarliðsins ÍR, hefur framlengt samningi sínum við handknattleiksdeild ÍR til ársins 2026. Karen Tinna, sem er uppalin hjá félaginu, hefur verið ein af lykilleikmönnum meistaraflokks kvenna sem hefur leikið frábærlega í Olís deild kvenna í vetur og situr í 5. sæti. Karen Tinna er markahæsti leikmaður liðsins með 61 mark í 9 leikjum fyrir áramót.
Þráðurinn verður tekinn í Olísdeild kvenna á morgun, laugardag. ÍR-ingar taka á móti Íslandsmeisturum Vals í Skógarseli en þrjár viðureignir til viðbótar fara fram á morgun.
ÍR kom upp í Olísdeildina í vor eftir að hafa lagt Selfoss í fimm viðureigna umspili um keppnisrétt í deildinni.
„Karen Tinna hefur verið máttarstólpi liðsins undanfarin ár. Hún er frábær leikmaður og mikill leiðtogi innan vallar sem utan og því frábærar fréttir hún skuli leiða liðið áfram næstu árin,“ er haft eftir Sólveigi Láru Kjærnested þjálfara ÍR í tilkynningu handknattleiksdeildar ÍR í dag þar sem tíðindunum er fagnað.
Staðan Olísdeild kvenna og næstu leikir.
