Viktor Gísli Hallgrímsson markvörður landsliðsins og franska liðsins Nantes tekur ekki þátt í fleiri leikjum á keppnistímabilinu. Hann er að fara í aðgerð vegna meiðsla á olnboga sem tóku sig upp í byrjun mars og hafa plagað hann um nokkuð langt skeið.
Snorri Steinn Guðjónsson landsliðsþjálfari í handknattleik karla sagði frá þessu í gær þegar hann valdi landsliðshópinn sem mætir Eistlendingum í undankeppni heimsmeistaramótsins í fyrri hluta næsta mánaðar.
Viktor Gísli hefur ekkert leikið með Nantes í hálfan annan mánuð og varð að draga sig út úr landsliðshópnum sem mætti Grikkjum í tveimur vináttuleikjum í fyrri hluta síðasta mánaðar.
Ágúst Elí Björgvinsson og Björgvin Páll Gústavsson standa vaktina í íslenska markinu í leikjunum við Eistlendinga. Ágúst Elí hljóp einnig í skarðið fyrir Viktor Gísla vegna meiðsla í olnboga haustið 2022.
