Færeyski landsliðsmaðurinn Rógvi Dal Christiansen leikur ekki með Fram næstur vikurnar, að sögn Sebastians Alexanderssonar, þjálfara liðsins. Annar ökkli Christiansen er í mesta ólagi eftir að hann sneri sig illa í leik með færeyska landsliðinu í undankeppni Evrópumótsins í kringum síðustu mánaðarmót.
Sebastian sagði við handbolta.is að ökklinn hafi verið stokkbólginn þegar Christiansen kom til landsins og vandséð væri að hann næði sér alveg á næstunni en ekki er langt eftir af keppnistímabilinu.
Framarar eru ekki á flæðiskeri staddir með línumenn þótt vissulega sé söknuður að hinum sterka Færeyingi. Þorvaldur Tryggvason og Arnór Róbertsson hlaupa í skarðið á meðan Christiansen er fjarri góðu gamni. Arnór er nýlega kominn inn í Olísdeildarlið Fram eftir að hafa gert það gott með ungmennaliði Fram í Grill 66-deildinni í vetur. Eplið fellur sjaldan langt frá eikinni í tilfelli Arnórs. Hann er sonur hins þrautreynda landsliðsmanns og atvinnumanns í Þýskalandi um árabil, Róberts Sighvatssonar, og kom til Fram á síðasta sumri þegar Þróttur gafst upp á að halda úti meistaraflokki í handknattleik karla.
