„Ég sé fram á hörkuskemmtilega keppni í Olísdeild kvenna. Fyrir utan þrjú til fjögur lið þá eru hin liðin nokkuð jöfn. Framundan er hörkukeppni sem við erum spennt fyrir að taka þátt í,“ sagði Guðmundur Helgi Pálsson þjálfari Aftureldingar sem kominn er með lið sitt upp í Olísdeildina á nýjan leik eftir árs veru í Grill 66-deildinni.
Afturelding sækir ÍR heim í fyrstu umferð Olísdeildar kvenna í dag. Leikurinn hefst klukkan 13.30 í Skógarseli í Breiðholti.
„KA/Þór, Stjarnan, ÍR og Afturelding eru að mínu mati lið sem eru á svipuðum stað. Milli liðanna verður mikil og skemmtileg keppni. Hinsvegar er hætt við því að hin liðin fjögur, Valur, Haukar, ÍBV og Fram verði í sérflokki fyrir ofan og að deildin verði tvískipt þegar á líður mótið,“ sagði Guðmundur sem þjálfað hefur Aftureldingu í fjögur ár.
Að því kemur
„Við höfum verið sannkallað jójó-lið á síðustu árum og farið á milli deildanna undanfarin ár og ekki staldrað við nema í eitt ár í hvorri deild í senn. Í hópnum í dag eru margar stelpur sem hafa tekið þátt í þessu ferðalagi okkar. Þær hafa vaxið af reynslu og hún er að skila sér. Það kemur að þeim tímapunkti að hlutirnir ganga upp og það er okkar markmið að takmarkinu verði náð og okkur takist að halda sæti í Olísdeildinni þegar upp verður staðið í vor,“ sagði Guðmundur Helgi Pálsson þjálfari Aftureldingu sem eins og aðrir hlakkar til að keppni í deildinni hefjist í dag.
Dagskráin: Olísdeild kvenna hefst og 1. umferð lýkur
Spáin: Valur ber höfuð og herðar yfir önnur lið
