„Við komum leikmönnum Magdeburg í opna skjöldu með því að leika sjö á sex í sókn frá byrjun, nokkuð sem við höfum ekki gert á keppnistímabilinu. Þetta herbragð lagði grunn að sigri okkar,“ sagði Oddur Gretarsson, leikmaðu Balingen-Weilstetten, við handbolta.is en Oddur og félagar unnu afar óvæntan sigur á Magdeburg í þýsku 1. deildinni í handknattleik í gærkvöld, 28:26, á heimavelli Magdeburg. Liðin eru hvort á sínum enda stöðutöflunnar í þýsku 1. deildinni og hafa verið allt tímabilið.
„Okkur vantaði leikmenn og þess vegna vorum við tilneyddir að breyta um leikaðferðir og það virtist koma Magdeburg á óvart að þessu sinni,“ sagði Oddur sem var markahæstur hjá Magdeburg með sex mörk. Sigurinn færði Balingen fjær fallsvæðinu en fjögur neðstu lið deildarinnar falla í 2. deild við lok leiktíðar í sumar. Til stendur að fækka liðum niður í 16 í 1.deild en þau eru 20 á yfirstandandi tímabili vegna þess að ekkert féll úr deildinni í fyrravor vegna heimsfaraldursins en keppni var hætt áður en öll kurl voru komin til grafar.
„Svo vorum frábærir í vörninni ofan á annað. Um leið fylgdi markvarslan með. Þetta var sætur og mjög mikilvægur sigur. Skiljanlega erum við gríðarlega ánægðir með frammistöðuna og stigin tvö sem koma á afar góðum tíma,“ sagði Oddur Grétarsson ennfremur í samtali við handbolta.is í gærkvöld.
Nánar má lesa um leiki gærkvöldsins og sjá stöðuna í deildinni í greininni hér fyrir neðan.
