- Auglýsing -

Kristianstad komið í góða stöðu

Ólafur Andrés Guðmundsson í leik með IFK Kristianstad. Mynd/EPA

Íslendingaliðið IFK Kristianstad stendur vel að vígi í keppni við Malmö í átta liða úrslitum sænsku úrvalsdeildarinnar í handknattleik karla. Kristianstad vann Malmö öðru sinni í dag og að þessu sinni í Kristianstad, 31:28. Liðið hefur þar með tvo vinninga og þarf aðeins einn í viðbót til þess að öðlast sæti í undanúrslitum. Malmö er án sigurs.


Leikmenn Malmö voru marki yfir að loknum fyrri hálfleik, 14:13.
Ólafur Andrés Guðmundsson var markahæstur hjá Kristianstad með sex mörk í 11 skotum og átti fjórar stoðsendingar.


Teitur Örn Einarsson lék með Kristianstad í um fimm mínútur í leiknum í dag og skoraði eitt mark. Teitur Örn hefur alls ekki jafnað sig til fulls af höfuðmeiðslum sem hann varð fyrir á dögunum.


Næsti leikur liðanna verður í Malmö á föstudaginn.


Daníel Freyr Andrésson og félagar í Guif töpuðu illa í gærkvöld fyrir Sävehof, 32:21, í fyrsta leik liðanna í 8-liða úrslitum. Leikið var á heimavelli Sävehof í Partille.

- Auglýsing -
- Auglýsing -

Nýjustu fréttir

- Auglýsing -