Þýski landsliðsmarkvörðurinn Johannes Bitter er smitaður af kórónuveirunni. Þetta var staðfest í dag eftir að annað jákvætt sýni greindist hjá honum í dag. Bitter greindist smitaður í gær eftir að hann kom heim með landsliðinu frá Tallinn í Eistlandi. Hann fór þar af leiðandi í annað próf sem reyndist hafa sömu niðurstöðu.
Ekki er hægt að útiloka að fleiri leikmenn landsliðsins hafi smitast. Bitter mun hafa verið með tveimur samherjum sínum úr landsliðinu í bíl frá flugvelli og til síns heima eftir heimkomuna frá Eistlandi aðfararnótt mánudagsins.
Bitter lék báða leiki þýska landsliðsins í undankeppni EM, gegn Bosníu í Düsseldorf á fimmtudaginn og við Eistland í Tallinn á sunnudag. Hann fór í sýnatöku við heimkomuna frá Tallinn og þá varð vart við veiruna. Aðrir í þýska landsliðinu hafa ekki greinst jákvæðir, eftir því sem fram kemur í tilkynningu frá þýska handknattleikssambandinu. Leikmenn, þjálfarar og starfsmenn landsliðsins fóru í fimm sinnum hver í próf þá viku sem landsliðið var saman dagana í kringum landsleikina.
Bitter er í einangrun en finnur ekki til einkenna. Ljóst er að hann leikur ekki með Stuttgart á næstunni. Stuttgart, sem Elvar Ásgeirsson og Viggó Kristjánsson leika með, mætir Erlangen annað kvöld og Hannover-Burgdorf á laugardaginn í þýsku 1. deildinni.
„Það er mér hulin ráðgáta hvar ég hef smitast,“ segir Bitter í samtali við þýska fjölmiðla. „Við sem vorum í landsliðshópnum vorum í vernduðu umhverfi þar sem í einu og öllu var farið eftir ströngust sóttvörnum, að okkar mati.“
