Nikolaj Jacobsen, landsliðsþjálfari Dana í handknattleik karla, er kominn í sóttkví að eigin frumkvæði á heimili sínu á eyjunni Thurø, suður af Fjóni. Jacobsen segist ekki vilja eiga á hættu að smitast af kórónuveirunni í aðdraganda að æfingum og leikjum danska landsliðsins í næstu viku.
Danska landsliðið kemur saman til æfinga á mánudaginn og leikur við landslið Sviss miðvikudaginn 4. nóvember á Árósum. Þremur dögum síðar sækja Danir Finna heim laugardaginn 7. nóvember. Báðir leikirnir verða liður í undankeppni EM2022.
Danska landsliðið mun búa einangrað á hóteli í Herning í næstu viku og má ekkert fara út af hótelinu nema til æfinga og síðan í leikinn í Árósum.
Jacobsen hefur ekki farið á handboltaleik síðan 22. september þegar hans fyrrverandi lærisveinar í Rhein-Neckar Löwen sóttu danska liðið TTH heim í forkeppni Evrópudeildarinnar.
