Goran Perkovac landsliðsþjálfara Króata í handknattleik karla var sagt upp störfum í dag í ljósi árangurs landsliðsins á Evrópumótinu í handknattleik í Þýskalandi í síðasta mánuði. Perkovac tók við starfinu í apríl á síðasta ári fljótlega eftir að Hrvoje Horvat varð að taka pokann sinn í kjölfar þess að króatíska landsliðið hafnaði í 9. sæti á HM og tryggði sér sæti í forkeppni Ólympíuleikanna.
Undir stjórn Perkovac varð króatíska landsliðið í 11. sæti á Evrópumótinu í Þýskalandi í síðasta mánuði. Króatar fóru afar vel af stað á mótinu og unnu Spánverja með 10 marka mun, 39:29, í fyrstu umferð riðlakeppninnar.
Eftir það gekk á ýmsu m.a. jafntefli við Austurríki og tap fyrir Frakklandi, Íslandi og Ungverjalandi í milliriðlakeppninni. Sigur á Þjóðverjum í síðustu umferð milliriðlakeppninnar hjálpaði lítið upp á sakirnar. Króatar ráku lestina í milliriðli eitt.
Forkeppni ÓL í næsta mánuði
Ekki liggur fyrir hver tekur við að Perkovac. Eftirmaður verður tilnefndur á næstu dögum. Framundan hjá króatíska landsliðinu er þátttaka í forkeppni Ólympíuleikanna upp úr miðjum mars. Króatar verða með Alsír, Austurríki og Þýskalandi í riðli sem leikinn verður í Hannover í Þýskalandi. Tvö lið fara áfram og víst að eftirmaður Perkovac mun ekki vera lengi í stól landsliðsþjálfara takist ekki að tryggja þátttökurétt á Ólympíuleikunum í sumar.
