Lánsmaður má ekki vera með

Gísli Jörgen Gíslason sem gekk til liðs við Þór Akureyri að láni frá FH í byrjun febrúar má ekki leika með Þór gegn FH í Olísdeildinni þegar liðin mætast í Kaplakrika klukkan 18 í dag.

Ásgeir Jónsson, formaður Handknattleiksdeildar FH, staðfesti við handbolta.is í dag að í samkomulagi sem gert var milli FH og Þórs þegar Gísli Jörgen var lánaður var tekið fram að hann léki ekki með Þór gegn FH.

Gísli Jörgen lék einn leik með FH áður en hann fór á lán til Þórs. Síðan Gísli Jörgen fór norður hefur hann tekið þátt í sjö leikjum með Akureyrarliðinu og skorað 11 mörk.