- Auglýsing -
Andri Snær Stefánsson, þjálfari Íslands- og bikarmeistara KA/Þórs í handknattleik kvenna segir að danska handknattleikskonan Sofie Söberg Larsen leiki ekki fleiri leiki fyrir KA/Þór. Larsen er unnusta færeyska línumannsins Pæturs Mikkjalsson sem yfirgaf KA í síðasta mánuði.
“Hún [Larsen] mun ekki spila meira með okkur í vetur, því miður. Þar sem Pætur er farinn til Færeyja þá fer hún með honum þangað,” sagði Andri Snær við handbolta.is í morgun.
Segja má að Larsen hafi komið óvænt inn í lið KA/Þórs þegar KA hafði samið við Mikkjalsson og í ljós kom að unnusta hans var hin prýðilegast handknattleikskona.
Larsen lék tvo leiki í Olísdeildinni með KA/Þór og skoraði fjögur mörk. Hún var einnig með liðinu í Coca Cola-bikarnum í september og október og var m.a. í sigurliði KA/Þórs í keppninni í byrjun október. Einnig tók Larsen þátt í Evrópuleikjunum við KHF Istogu frá Kósovó í 1. umferð Evrópubikarkeppninnar. Fljótlega eftir leikina við Istogu fór Larsen til náms í Danmörku en vonir stóðu til að hún mætti til leiks á nýju ári. Af því verður ekki vegna vistaskipta unnustans.
- Auglýsing -
