Sebastian Alexandersson, þjálfari karlaliðs Fram, staðfesti við handbolta.is í gærkvöld að leikur Fram og FH, sem fyrirhugaður er 17. mars verði fluttur aftar á dagskrá Olísdeildarinnar. Ástæðan er sú að færeysku landsliðsmennirnir hjá Fram, Rögvi Dal Christiansen og Vilhelm Poulsen, leika með færeyska landsliðinu í undankeppni EM í næstu viku, eins og handbolti.is sagði frá í fyrradag.
Christiansen og Poulsen eru ekki væntanlegir til Íslands aftur fyrr en mánudaginn 15. mars þar sem síðasti leikur færeyska landsliðsins af þremur á viku fer fram í Þórshöfn sunnudaginn 14. mars. Við komuna til Íslands bíður þeirra fimm daga sóttkví. Sebastian sagði að ekki kæmi til greina að mæta til leiks 17. mars gegn FH án Christiansen og Poulsen.
Næsti leikur Framara í deildinni verður þar með ekki fyrr en sunnudaginn 21. mars gegn ÍR. Þá verða Christiansen og Poulsen lausir úr sóttkví gangi allt að óskum.
