Eftir æfingu í morgun, hádegisverð og fund með fjölmiðlum, þá fengu leikmenn kvennalandsliðsins í handknattleik frjálsan tíma eftir hádegið í dag og fram á miðjan dag. Tækifæri til þess að hitta fjölskyldur sína sem eru í Stafangri til að styðja við bakið á þeim með ráðum dáð.
M.a. eru fjórar mæður í landsliðinu sem hittu börn sín eftir talsverða fjarveru, Perla Ruth Albertsdóttir, Sunna Jónsdóttir, Þórey Anna Ásgeirsdóttir og Þórey Rósa Stefánsdóttir eiga allar ung börn.
Leikmenn hafa verið í Noregi á aðra viku og víst er að endurfundir með fjölskyldunni verða kærkomnir og gott uppbrot frá undanförnum dögum.
Síðdegis verður Arnar Pétursson með æfingu í íþróttasal skammt frá keppnishöllinni. Á æfingunni verður lagt á ráðin með viðureignina við Frakka sem hefst klukkan 17 á morgun.
