„Ég vil byrja á að þakka Val fyrir fyrir frábærar móttökur, erfiðan leik, frábæra stemningu. Valur lék kraftmikinn handbolta sem olli okkur erfiðleikum, ekki síst í vörninni,“ sagði Maik Machulla, þjálfari Flensburg á blaðamannafundi eftir fimm marka sigur liðsins á Val í þriðju umferð B-riðils Evrópudeildarinnar í handknattleik í Origohöllinni í kvöld, 37:32.
Flensburg hefur þar með sex stig eftir þrjá leiki en Valur er þar á eftir með fjögur stig eins og franska liðið PAUC sem Valsmenn mæta ytra í næstu viku.
„Ég var lengst af óánægður með varnarleik okkar í kvöld þótt okkur tækist betur til við að finna lausnir á honum í síðari hálfleik. Sóknarleikurinn var hinsvegar góður hjá okkur. Ég er fyrst og fremst ánægður með stigin. Við lékum erfiðan leik við Melsungen í Þýskalandi á sunnudaginn og komum síðan beint hingað. Dagurinn í gær fór í ferðalag og undirbúning fyrir viðureignina,“ sagði Machulla þjálfari ennfremur.
„Ég er ánægður með stöðu okkar í riðlinum eftir þrjá leiki. Framundan eru fleiri erfiðir leikir keppninni. Ég óska Valsmönnum góðs gengis í næstu leikjum,“ sagði Maik Machulla sem hefur verið aðalþjálfari Flensburg í fimm ár en var áður í önnur fimm ár aðstoðarþjálfari liðsins.
