Landsliðskonan í handknatteik, Lilja Ágústsdóttir, hefur skrifað undir nýjan þriggja ára samning við Val. Gildir nýi samningurinn út keppnistímabilið vorið 2026.
Lilja, sem leikur aðallega í vinstra horni, er uppalin Valsari sem hefur þrátt fyrir ungan aldur töluverða reynslu í meistaraflokki auk yngri landsliðanna til viðbótar við að hafa leikið sex A-landsleiki.
Lilja er í A-landsliðshópnum sem valin var á dögunum og býr sig undir leikina við Ungverja í umspili í fyrri hluta apríl. Í leikjunum verður bitist um þátttökurétt á HM síðar á þessu ári.
Lilja lék síðari hluta keppnistímabilsins 2021/2022 með sænska úrvalsdeildarliðinu Lugi í Lundi. Hún var í U18 ára landsliðinu sem hafnaði í áttunda sæti á HM á síðasta sumri og mun örugglega banka fast á dyr þjálfara U19 ára landsliðsins áður en haldið verður á EM 19 ára landsliða sem fram fer í Rúmeníu í júlí.
Elín Rósa áfram í herbúðum Vals
Sara Sif heldur kyrru fyrir á Hlíðarenda
