Eins og mál standa um þessar mundir eru mestar líkur á að leikirnir í riðili íslenska kvennalandsliðsins í handknattleik í forkeppni heimsmeistaramótsins fari fram í Litháen fjórða, fimmta og sjötta desember. Margir varnaglar hafa þó verið slegnir m.a. vegna kórónuveikifaraldursins og takmarkanna sem kunna þá að vera á ferðalögum vegna hans. Handbolti.is hefur samkvæmt heimildum að Litháar hugsi sér gott til glóðarinnar að verð gestgjafar og styrkja stöðu sína í keppnina um tvö efstu sæti riðilsins sem gefa þátttökurétt í umspilsleikjum um farseðil á HM 2021.
Dregið var í riðla í júlí og dróst íslenska landsliðið, sem var í öðrum styrkleikaflokki í riðil með Litháen, Grikklandi og Norður-Makedóníu, í enn eitt skiptið. Landslið Norður-Makedóníu hafa verið reglulegir andstæðingar íslensku A-landsliðanna á undanförnum árum, jafn í undankeppni stórmóta svo og í aðalkeppni. Sem dæmi má nefna að þegar íslenska kvennalandsliði tók þátt i forkeppninni fyrir tveimur árum þá voru Norður-Makedóníumenn gestgjafar riðlakeppninnar.
Forkeppnin fer fram í fjórum riðlum og komast tvær efstu þjóðir hvers riðils áfram í umspilsleiki sem ráðgert er að verði háðir 16. til 21. apríl á næsta ári.
Íslenska landsliðið komst upp úr forkeppninni fyrir tveimur árum ásamt Norður-Makedóníu en lenti hinsvegar á vegg þegar það mætti landsliði Spánar í umspilsleikjum vorið 2019 og sat eftir með sárt ennið.
Þátttökuþjóðir HM kvenna 2021 verða 32 en ekki 24 eins og verið hefur frá miðjum tíunda áratug síðustu aldar. Vonandi verður breytingin til þess að auka möguleika íslenska landsliðsins á að taka þátt í HM á næstu árum.
Ísland hefur aðeins einu sinni verið með á HM kvenna, árið 2011 í Brasilíu, og gekk vel. Sigur vannst m.a. á sterkum liðum Svartfellinga og Þjóðverja. Lauk íslenska landsliðið keppni eftir tap fyrir firnasterku liði Rússa í 16-liða úrslitum.
HM kvenna á næsta ári fer fram í desember á Spáni.
