Hrannar Bragi Eyjólfsson hefur skrifað undir nýjan tveggja ára samning við Stjörnuna og mun því vera áfram hjá uppeldisfélagi sínu næstu árin. Hrannar Bragi er miðjumaður sem lék alla leikina 22 með Stjörnunni í Olísdeildinni á síðasta tímabili og skoraði 24 mörk.
Hrannar Bragi byrjaði ungur að æfa handbolta með Stjörnunni eins og bróðir hans Sverrir. Aðalsteinn, þriðji bróðurinn, hefur árum saman verið þjálfari í Þýskalandi og nú í Sviss.
Hrannar Bragi útskrifaðist úr Háskólanum í Reykjavík á síðasta ári með meistaragráðu í lögfræði. Hann starfar nú hjá Almenna Lífeyrissjóðnum eftir því sem fram kemur í tilkynningu frá Stjörnunni. Í henni er ennfremur haft eftir Patreki Jóhannessyni, þjálfara karlaliðs Stjörnunnar vegna samningsgerðarinnar við Hrannar Braga: „Hrannar Bragi er mikill liðsmaður og með stórt Stjörnuhjarta. Hann er með yfirburðar leikskilning og stjórnar vel leikjum á miðjunni. Hans styrkur er einnig varnarlega þar sem hann lætur vel finna fyrir sér. Topp drengur sem elskar félagið sitt.“
