„Við erum spenntar að mæta þeim og reiknum með hörkuleik. Þekkjum ágætlega til þeirra eftir að hafa leikið tvo æfingaleiki við þær úti fyrir ári síðan og skoðað upptökur með síðasta leik þeirra sem var við Svía á fimmtudaginn,” sagði Thea Imani Sturludóttir landsliðskona í handknattleik í samtali við handbolti.is.
„Þær eru í mikilli framför, hafa sótt mikið í sig veðrið. Þær leika mikið maður á mann, eru með kröftugar fintur og það getur verið erfitt að stöðva þær þegar þær komast á ferðina,” sagði Thea Imani ennfremur.
„Við einbeitum okkur að okkar leik og að ná með honum sem mest að forðast að þær nái þeim stöðum sem þær sækjast eftir að ná. Við verðum að komast í kontakt og brjóta á þeim,“ sagði Thea og bætti við að vel hafi verið farið yfir viðureign Færeyinga við Svía á fimmtudaginn, sem lauk með 17 marka sigri Svía. Færeyingar léku vel í fyrri hálfleik í þeirri viðureign sem fram fór í Uppsölum í Svíþjóð.
„Mér líst vel á leikinn framundan. Úrslitin munu ráðast á varnarleiknum. Vörn vinnur leiki,“ sagði Thea Imani Sturludóttir sem hefur náð sér eftir að hafa fengið boltann í andlitið í leiknum við Lúxemborg á Ásvöllum á miðvikudaginn.
Viðureign Íslands og Færeyja hefst klukkan 14 í dag að íslenskum tíma.
