Karlalandsliðið í handknattleik mætir gríska landsliðinu öðru sinni í vináttuleik í Aþenu dag. Flautað verður til leiks klukkan 17.15 í íþróttahúsi í borgarhluta Aþenu sem nefndur er Korydallos.
Íslenska landsliðið vann með 11 marka mun í gær, 33:22, eftir að hafa verið einu marki yfir í hálfleik, 14:13. Upphafskafli íslenska liðsins mun hafa verið brösóttur og voru Grikkir yfir framan af. Þegar á leið sóttu leikmenn íslenska liðsins í sig veðrið.
Í síðari hálfleik tóku þeir öll völd á leikvellinum og höfðu talsverða yfirburði. Bæði lið eru að búa sig undir umspilsleiki HM sem fram fara í fyrri hluta maí.
Útsending á handboltapassanum
Þrátt fyrir að útsending frá leiknum í gær hafi gengið upp og ofan þá hafa árar ekki verið lagðar í bát. Óhikað verður haldið áfram í dag og önnur tilraun gerð. Kjartan Vídó Ólafsson markaðsstjóri HSÍ staðfesti við handbolta.is í morgun að leikurinn verður sendur út á Handboltapassa Símans, sem að mörgum handboltaunnendum er orðinn að góðu kunnur.
Handbolti.is hyggst fylgjast með framvindu leiksins eins og kostur verður á auk þess að gefa næst síðustu umferð Olísdeildar kvenna gaum en landsleikurinn skarast við leikina í Olísdeidinni sem hefjast klukkan 17.30.
