Landslið Sviss verður andstæðingur íslenska landsliðsins í leiknum um 7. sæti á heimsmeistaramóti 20 ára landsliða kvenna í handknattleik á sunnudaginn. Leikurinn fer fram í Boris Trajkovski Sports Center, þjóðarhöll Norður Makedóníu og hefst klukkan 8 að morgni að íslenskum tíma, tíu að staðartíma. Ekki verður sofið út þann morguninn.
Sviss tapaði fyrir Portúgal í kvöld, 30:25, eftir að hafa snúið leiknum sér í hag strax í upphafi síðari hálfleiks. Sviss með tveggja marka forskot, 15:13, í hálfleik.
Portúgalska liðið lék afar vel í síðari hálfleik auk þess sem markvörður liðsins varði allt hvað af tók. Svissneska liðinu þvarr máttur þegar á leið.
Ungverjar og Frakkar í úrslitum
Ungverjar og Frakkar mætast í úrslitaleik heimsmeistaramótsins. Frakkar unnu Dani örugglega, 32:26, í kvöld. Áður höfuðu Ungverjar lagt Hollendinga að velli í hinni viðureign undanúrslita, 28:24. Ungverska liðið lenti í mesta basli með Hollendinga og máttu þakka fyrir sigurinn í leiknum, eins og gegn Íslendingum í gærkvöld.
Leikjadagskrá sunnudagsins á HM U20 ára landsliða í Skopje:
1. sæti: Frakkland – Ungverjaland, kl. 15.30.
3. sæti: Danmörk – Holland, kl. 12.30.
5. sæti: Svíþjóð – Portúgal kl. 10.15.
7. sæti: Ísland – Sviss, kl. 8.00
-allar tímasetningar eru vitanlega miðaðar við klukkuna á Íslandi.
